Umwami yabaga afite inzu ye yihariye nini kurusha izindi zabaga ziri ibwami, ikaba inzu yari ifite amategeko yo kuyinjiramo ndetse ifite ibice biyigize bifite amazina yihariye.

1. Inzu y’umwami yabaga hagati y’izindi ibwami ikitwa Kambere

2. Imbere y’inzu y’umwami habaga umurongo  Nyirantarengwa, utagombaga kurenga nta ruhushya ufite rw’umwami

3. Imbere mu nzu harimo inkingi Kantagazi cyangwa Imbazi.

4. Iyo wakoraga kuri iyo nkingi bagiye kuguhana, wahitaga uhabwa imbabazi.

5. Imbere mu nzu, abagore bicaraga ukwabo n’abagabo bakicara ukwabo

6. Inkingi Mbonabihita yicarwagaho n’umugabo ushinzwe umutekano w’umwami

7. Uburiri bw’umwami busasheho ibirago

8. Inzira y’umugabo, umwami yagiraga urwuririro rwe agana ku buriri

9.  Inzira y’umugore, umwamikazi yagiraga urwuririro rwe agana ku buriri

10. Aho umwami yaganiriraga n’umwamikazi (Gutera akabariro),hakaba n’uruhu rw’inka rwifashishwaga mu rwego rw’isuku.

11. Ku musego w’uburiri, habaga agacuma karimo inzoga, agaseke k’imbuto, n’aho yabikaga imyambaro n’ibindi bintu bifite akamaro.

12.Ku rwuririro habaga harimo agasambi kameze nk’urugi gatuma utareba imbere ku buriri

13. Ahantu hicaraga abagore baririmbira Ibihozo Umwami

14. Uruhimbi, aho baterekaga Amata

15. Inzu yabaga ifite uruganiriro, aho umwami yaganiraga n’abana, inshuti, abashyitsi be.

16. Icyotero, umuriro umwami yoteragaho, wabaga urinzwe n’abagabo babiri kugirango ibishashi bitagwa ku mwami.

17. Ikiramiro, inkingi umwami yegamagaho igihe yashobora guseka cyane agatembagara.

18. Inzu y’umwami yabaga yubakishije ibyatsi n’ibiti

19. Kubyuka ku Mwami: Umwami yarabambukaga

Self Community Village ni ahantu ho gusura igihe watembereye mu mujyi wa Huye kubera ibyiza byinshi bihari. Ahantu ho kugurira Impano,urwibutso rw’ ibikorerwa mu mujyi wa Huye no mu karere ka Huye muri rusange kandi ku giciro cyiza.

1.Uzahasanga Ibikorwa by’Ubuhinzi n’ubworozi

Akarere ka Huye gafite abahinzi n’aborozi benshi,bamwe bibumbiye mu mashyirahamwe atandukanye, bashing inganda ziciriritse , ibyo byabafashije gukora ibintu bitandukanye ,maze bongerera agaciro ibikorwa biva mu karere kabo harimo; imitobe itandukanye, Urwagwa, ubuki ,umuceli, ikawa n’ibindi.

2. Uzahasanga Ibikorwa by’Ubugeni

Ni ahantu hari ibikorwa by’abanyabugeni bitandukanye ari imitako yo mu nzu, imyenda yo kwambara ya bantu mu ngeri zose. Bimwe muri byo bikozwe mu bikoresho bya gakondo,ibiti n’ibindi.

3. Uzahasanga uruganda rukora amasabune

Uruganda rw’Urubyiruko rukora Isabune y’amazi ni bamwe mu berekana ibyiza bikomoka mu karere ka Huye.Ni urubyiruko rwihangiye imirimo rubasha kwishakira akazi bitewe n’ibyo bize, hari abize kaminuza n’abarangije ayisumbuye bishyize hamwe bakora ayo masabune yo gukoresha mu rugo, yo kogesha imodoka n’ibindi.

4. Ni hafi y’ikigo abagenzi bafatiramo imodoka

Bakorera hafi ku buryo abantu bose biborohera kubagana. Ni hafi y’ikigo abagenzi bategeramo imodoka ku muhanda ugana I Nyamagabe, iruhande rw’umuhanda uzamuka ugana kuri Gereza.

Tariki ya 29 Kanama 2001, kiliziya yemeje amabonekerwa y’I Kibeho,ni hamwe mu hantu hemerewe gukorerwa urugendo Nyobokamana mu Rwanda. Ni byiza kumenya ahantu wasura igihe wagiye ku butaka butagatifu. I Kibeho niho hantu muri Afurika hemejwe habaye amabonekerwa.

1.Imbuga y’amabonekerwa

Ahantu hafatwa nk’imbuga y’amabonekerwa, hari ishusho igaragaza Bikira Mariya w’I Kibeho, ishapule, ni ahantu hari intebe zihakikije ndetse hatanse indabyo z’amoko atandukanye. Hari n’inzu yo gushengereramo y’umubyeyi Bikira Mariya.

2. Ingoro ya Nyina wa Jambo

Ni byiza gusura ingoro ya Nyina wa Jambo yubatse iruhande rw’imbuga y’amabonekerwa. Ni umwanya mwiza wo gusenga utuje kandi wiherereye.Ku ngoro hariho ubutumwa 12 bw’umubyeyi Bikira Mariya mu ndimi enye.Haba Misa ntagatifu;  mu minsi isanzwe (6h30), kuwa Gatanu no kuwa Gatandatu(6h30,17h30), ku cyumweru(7h30,11h). Ku mugoroba  ubanziriza  umunsi wa Bikira Mariya Misa iba (16h30),naho ku munsi wa Bikira Mariya iba 11h.Ku minsi y’ingendo nyobokamana haba misa zihariye.

3. Radio Maria Kibeho

Mu rwego rwo gusakaza ubutumwa bwa Bikira Mariya ku isi hose, I Kibeho hari Radio Mariya Kibeho ifasha gukomeza gutambutsa ubutumwa bwe ku bantu bose,kandi ubutumwa buvuye impande zose z’isi. Ni ahantu wasura ukareba iyo Radiyo y’umubyeyi Bikira Mariya. Yafunguwe ku mugaragaro tariki ya 28 Ugushyingo 2018.

4. Kwa yezu Nyirimpuhwe I Nyarushishi

Kujya gusengera kwa  yezu Nyirimpuhwe i Nyarushishi ni hamwe mu hantu hakomeza ukwemera. Ni ku musozi uri hakurya y’imbuga y’amabonekerwa, hari imbuga nini yo gusengeramo. Ni ahantu hatuje ho gusengera, nta rusaku, hateye ibiti byiza ndetse hari ishusho nini ya Yezu.Ubusitani burimo ikirugu kinini kandi hari  n’amashusho y’abatagatifu batandukanye.

5. Ku isoko ya Nyina wa Jambo

Amazi y’umugisha yo ku isoko y’umubyeyi. Ni amazi ari mu gishanga hepfo y’umusozi gato ku buryo byorohera umuntu kujya kuyavoma ndetse akazana n’ibumba. Byose birakiza ku muntu ufite ukwizera.

6. Shapeli yo gushengerera Isakaramentu Ritagatifu

I Kibeho hubatswe Shapeli yagenewe gushengereramo gusa, ni ahantu basaba umutuzo kuko baba barimo gusenga. Bagusaba kuzimya Telefone yawe cyangwa ibindi bitera ususaku. Ni shapeli ihora ifunguye ku buryo umuntu abasha kuyigana igihe cyose ashakiye. Mu busitani buyikikije harimo ibimenyetso biranga inzira y’umusaraba ya Yezu kugeza azutse, wabasha no kubona amagambo arindwi Yezu  yavugiye ku musaraba. Yafunguye tariki ya 31 Gicurasi 2018.

Umusore Munguyiko Jean Claude warangije kwiga indimi(Lettres) ,utuye mu mujyi wa Rubavu. Jean Claude akunda umuziki cyane wo mu jyana ya RnB.

Dore ikiganiro yagiranye n’Igicumbi.com:

Ni hehe watembereye mu Rwanda?

Natembereye I  Nyanza mu Rukari

Ni uwuhe muntu cyangwa ikintu mu mateka y’u Rwanda ukunda cyangwa uzirikana?

Mu mateka y’u Rwanda nzirikana Mgr Bigirumwami Aloys.

 Ni hehe uheruka gutemberera cyangwa kugera mu Rwanda

Mperuka gutemberera mu mujyi wa Musanze.

Ni ayahe mafunguro ya Kinyarwanda ukunda?

Mu mafunguro ya Kinyarwanda nkunda imyumbati itetse ku bishyimbo.

Ni ikihe kinyombwa cya Kinyarwanda ukunda?

Mu binyombwa bya Kinyarwanda nkunda Umusururu

Ni iki witwaza iyo utembereye cyangwa uri mu rugendo?

Mu rugendo nitwaza   Appareil yo gufotora n’amazi.

Ni irihe torero ribyina  Kinyarwanda ukunda?

Mu matorero yo mu Rwanda nkunda Amasimbi n’Amakombe

Ni hehe mu Rwanda watembereye cyangwa wageze ukumva urahakunze?

Nakunze I Nyanza mbone ukuntu inzu y’umwami yabaga yubatse

Ujya mu ntara z’u Rwanda,ni ikihe kigo gitwara abagenzi ukunda?Kubera iki

Nkunda RITCO Ltd igira gahunda kandi n’imodoka zabo ni nziza.

Ni uwuhe muhanzi,umwanditsi,umunyabugeni w’umunyarwanda ukunda?N’igihangano cye ukunda?

Nkunda umuhanzi King James ,nkakunda indirimbo ye Ndagukunda

Uwaguhitishamo ahantu ho gutura mu Rwanda,wahitamo he?Kubera iki?

Nahitamo gutura I Rubavu too! Kubera amazi n’abaturanyi bacu

Ni irihe serukiramuco ukunda mu Rwanda?

Ntaryo ndajyamo ariko jya ntumva abera I Kigali!

Ni ikihe gihugu cya Afurika wifuza kuba watemberamo?Kubera iki?

Nifuza gutembera muri Afurika y’epfo ni igihugu ntumva giteye imbere cyane,haba ibintu byinshi byo gusura.

Ni hehe hafite amateka mu Rwanda wifuza kugera ?

Nifuza gutembera mu ngoro ndangamurage zose zo mu Rwanda.

 Ni hehe uteganya gutemberera mu mwaka wa 2018?

Ndateganya kujya gutembera muri Pariki ya Nyungwe,nkagenda kuri kiriya Kiraro.

Murakoze Jean  Claude

Murakoze na mwe.

 

Gukora urugendo uturutse mu mujyi wa Kigali ugana mu mujyi wa Karongi ni ahantu hareshya n’amasaha atatu- ane, hareshya n’ibirometero biri hejuru y’ijana.

Ku muhanda hari ibintu byinshi wasura, wamenya, bigizwe n’ibintu ndangamuco na ndangamateka y’u Rwanda n’ibidukikije byihariye bigize imirage kamere.

Dore ibintu 15 wasura biri hafi y’umuhanda:

1. Ikiraro kigabanya umujyi wa Kigali n’ intara y’amajyepfo

2. Ijuru rya Kamonyi

3. Amasuka ya Papa Yohani Pawulo wa Kabiri

4. Urwibutso rwa Jenoside yakorewe abatutsi rwa Kamonyi

5. Igishanga cya Kanyoni

6. Mu cya kabiri cy’u Rwanda (mu mujjyi wa Muhanga)

7. Basilika  ya Kabgayi

8. Ikiraro kigabanya intara y’Amajyepfo n’intara y’uburengerazuba

9. Urutare rwa Ndaba

10. Urwibutso rwa Jenoside yakorewe abatutsi rw’I Nyange

11. Ahazwi nko mu Biryogo

12. Rubengera Milk Center

13. Umugezi wa Nyabahanga wisuka mu kiyaga cya Kivu

14. Ubworozi bw’amafi ku kiyaga cya Kivu

15. Kureba imisozi ikikije ikiyaga cya Kivu

 

 

 

Muri Kaminuza Nkuru y’u Burundi (Université du Burundi) habereye amahugurwa y’abanyeshuri baturutse muri Kaminuza zikorana na Agence Universitaire de la Francophonie n’abarwiyemezamirimo yuko bakora imirimo irambye igendanye n’ingamba (SDG/ODD) z’umuryango w’abibumbye (UN). Ni mu rwego rwo gushishikariza urubyiruko gutangira gutekereza  kwihangira imirimo bakiri muri Kaminuza.

amahugurwa yabaye kuva 26 Nzeri-12 Ukwakira 2018 ategurwa na Ambassade de France au Burundi na  Agence Universitaire de la Francophonie. Mu rwego rwo guteza imbere ubukerarugendo burambye,  bamwe batanze ibitekerezo by’uko bakora cyangwa bumva umuntu yakora ubukerarugendo burambye.

Umunyeshuri Nkingiyinka Arsène yiga  muri Université du Tanganyika. Akunda gutembera areba ibihigwa abandi bafite bitaba I Burundi. Agakunda kureba ibyiza nyaburanga by’u Burundi no kumenya ibikorerwa mu zindi ntara atavukamo.

Eugene Cubaka wo muri Université du Lac Tanganyika (ULT) yatangaje ko iyo agize umwanya wo gutembera aba ashaka kureba imibereho n’umuco byaho yatembereye. Akemenya neza imibereho yaho.

Nkengurutse Bellard yarangije kwiga muri Université du Burundi ibigendanye n’indimi. Yatangaje ko ni ukubungabunga ibibanza bikagumana umwimerere wabyo nta guhindura. Bakazana ibintu by’akaranga (biranga) u Burundi abashyitsi baje mu Burundi bagashobora kugura  cyangwa kubona ikintu cyeerekeye umuco w’u Burundi Urugero: Igisabo..Bakabagirira isuku, bagakoresha ibintu kama (gakondo) mu gufata amafunguro. Urugero bagakoresha Inkoko.

Nibaruta Diane, yarangije kwiga Amategeko. Ubu ni Rwiyemezamirimo. Igitekerezo cye ku bukerarugendo burambye ni ugutembera henshi akagenda areba ibyo yakora yakongera mu byo akora. Agashaka igishya yashyira mu bucuruzi bwe akaba grande entrepreneur.

Nkurunziza Léonard ari kwimenyereza gukora muri US Embassy I Bujumbura. Igitekerezo cye ku bukerarugendo burambye ni ugusura ahantu nyaburanga hafite amateka mu gihugu. Kwerekana ibibanza bya kera mu gihugu, bigatuma abandi babasha kuhamenya bakahaza.

Paul Sydney yarangije kwiga,azaba rwiyemezamirimo vuba. Iyo yatembereye asura ahantu nyaburanga, akagenda n’amaguru, igare, moto na busi agakunda kurya amafunguro gakondo (Le Kacoma, imbuto). Gutembera mu zindi ntara z’igihugu ni ikintu cyiza kubera bituma amenya ibintu byinshi.

Mahamadou Bachiory, wiga Médécine muri Université de Ngozi. Igitekerezo cye ku bukerarugendo burambye ni ukurya amafunguro y’umwimerere (naturel) arahendutse kandi aboneka ahantu henshi cyane muri Afurika.

Umunyeshuri Ntwari Olivier wiga informatique muri Université du Burundi, yatangajeko: umukerarugendo  yatembera ahantu hameze neza, akaronka abamufasha mu rugendo, ibimwunguruza bimeze neza hamwe n’ibibanza vyiratiro bisukuye neza kandi bikingiwe!(Igitekerezo kiri mu Kirundi).

 

Rwanda ni igihugu gifite ubuso bugana na kirometero kare 26 333, ni igihugu gifite umurwa mukuru wa Kigali. Umujyi wa Kigali ni umurwa mukuru w’u Rwanda kuva mu 1962, igihugu kikibona ubwigenge. Kuva mu mwaka wa 2006, umujyi wa Kigali ugizwe n’uturere dutatu aritwo Gasabo, Nyarugenge na Kicukiro. Umujyi wa Kigali ufite ubuso bungana na kirometero kare 738 (738 km2) ukaba urimo igice cy’umujyi n’igice cy’icyaro. Ni umujyi utuwe n’abaturage bagera kuri miliyoni 1,200.

Imijyi yuganira umurwa mukuru wa Kigali mu iterambere, ni imijyi ifite ibyiza byinshi byatuma abantu bajya kuyishakiramo akazi, guturamo, kwiga no gutembera. Ni imijyi yashyizwemo imbaraga ikagira ibishoboka byose byibanze bituma itera imbere harimo ibikorwaremezo, gutanga serivisi nziza, gushyiraho ahantu hagenewe inganda, ahantu ho gutura, gucururiza ndetse n'imyidagaduro kandi ikazafasha n'ibyaro biyegereye.

1. Umujyi wa Huye

Umujyi uri mu majyepfo y’u Rwanda, ufite amateka menshi cyane, uzwi nk’umujyi wubatsemo Kaminuza ya mbere Nkuru mu Rwanda. Ni umujyi unyurwamo n’imodoka zigana mu bihugu bidukikije nk’u Burundi, abagana mu mujyi wa Rusizi n’abasura Pariki y’Igihugu ya Nyungwe. Ni umujyi uri mu gace keramo umuceri kubera ibishanga n’imigezi ihaboneka, hakaba ubworozi bw’amatungo anyuranye.

Ni umujyi wo gukoreramo ibikorwa by’ubukerarugendo nko gusura ahantu ndangamateka na ndangamuco harimo inzu zifite amateka menshi. Ni umujyi urimo ingoro Ndangamurage ya mbere mu Rwanda (Ingoro y’imibereho y’abanyarwanda), gusura abanyabugeni n’inganda z’ikawa, kuzamuka imisozi n’ibindi.

2. Umujyi wa Muhanga

Umujyi uri hagati no hagati mu gihugu, umujyi ushobora kunyuramo ukagera aho ushaka hose mu Rwanda. Ni umujyi uri hafi ya Kigali mu rugendo rw’iminota mirogo itatu, umujyi urimo amashuri menshi, ahantu ndangamateka. Ni umujyi unyuramo ujya muyindi mijyi nka Karongi, Nyanza, Huye. Ni umujyi uri mugace kabamo ibikorwa by’ubuhinzi n’ubworozi n’ubucukuzi bw’amabuye yagaciro.

Ni umujyi wo gukoreramo ibikorwa by’ubukerarugendo nko kuzamuka imisozi ifite amashyamba menshi ndetse na kimeza nk’ishyamba rya Busaga riri hafi yawo mu ruhererekane rw'imisozi ya Ndiza, ahantu ndangamateka na ndangamuco nka hantu hazwi ko bazi kuboha imisambi/ibirago, ibyibo n’uduseke ndetse no gusenga. Haba n’igiturage cyiza byo gutemberamo.

3. Umujyi wa Nyagatare

Umujyi  uri ku nkiko z’u Rwanda mu burasirazuba, uri hafi y’igihugu cya Uganda, uzwi kuba unyurwamo n’abantu bajya cyangwa bava Uganda, ukaba umujyi uri ahantu h’umurambi. Ni umujyi ufite Kaminuza y’u Rwanda ishami ry’ubuhinzi n’Ubworozi bituma ugendwa cyane.Ukaba umujyi ufite amahirwe yo gukoreramo ibikorwa by’ubuhinzi, ubworozi n’ubucuruzi. Uri hafi ya Pariki y’Akagera ndetse n’ahantu ndangamateka hatandukanye nka Kagitumba n’ahandi.

umujyi ufite Kaminuza y’u Rwanda ishami ry’ubuhinzi n’Ubworozi bituma ugendwa cyane.Ukaba umujyi ufite amahirwe yo gukoreramo ibikorwa by’ubuhinzi, ubworozi n’ubucuruzi. Uri hafi ya Pariki y’Akagera ndetse n’ahantu ndangamateka hatandukanye nka Kagitumba n’ahandi.

4. Umujyi wa Rubavu

Umujyi ukurura abantu benshi cyane kubera uherereye ku nkengero z’ikiyaga cya Kivu, ugahana imbibi n’umujyi wa Goma muri RDC. Ni umujyi ufite umupaka wa mbere unyurwaho n’abantu benshi mu Rwanda ari abakora ubucuruzi, abatemberera muri ibi bihugu byombi no mu Karere. Uri mu karere kabamo ibikorwa b’ubuhinzi bw’ibirayi, imboga, icyayi, ubworozi bw’inka.

 

Ni umujyi ufite amahirwe menshi mu bikorwa by’ubukerarugendo kubera ukora ku kindi gihugu ndetse n’ibyiza nyaburanga byinshi bigiye biba hafi yawo nk’ingoro ya Mgr Bigirumwami Aloys, kuzamuka imisozi nka Rubavu, Rubona… kuroba isambaza, kugenda n’igare ku nkengero z’ikiyaga ndetse n’ibikorwa by’imikino.

5. Umujyi wa Musanze

Umujyi uri mu majyaruguru y’u Rwanda ku birenge by’ibirunga, ni umujyi ukurura abantu benshi kubera ikirere cyaho cyiza, isaha n’isaha imvura ishobora kugwa! Uri hafi y’umupaka w’u Rwanda na Uganda ku Cyanika, hakaba habera ubucuruzi cyane. Ni umujyi uri mu gace kabamo ibikorwa by’ubuhinzi cyane cyane ibirayi n’imboga. Ni umujyi uberamo inama, amahugurwa n’ibindi byinshi. Ukanyurwamo n’abagana mu yindi mijyi nka Rubavu, Muhanga, Rusizi na Goma (RDC).

Ni umujyi ufite ibikorwa by’ubukerarugendo nko gusura ibiyaga by’impanga, kuzamuka ibirunga, gusura amashyamba afite amateka menshi, gusura ubuvumo, kugenda mu mugezi wa Mukungwa, ibikorwa ndangamuco byihariye nk’imbyino zaho ndetse n’ibindi byinshi biri mu nkengero zawo.

6. Umujyi wa Rusizi

Umujyi uherereye mu burengerazuba bw'u Rwanda mu karere ka Rusizi, ugahana imbibi n'umujyi wa Bukavu mu gihugu cya Repubulika iharanira Demokarasi ya Congo(RDC). Ni umujyi ukorara ku kiyaga cya Kivu, hakaba ahantu haba ubucuruzi hagati y'ibihugu bitatu aribyo Rwanda,Burundi na RDC, umugezi ugabanya ibi bihugu usohoka mu Kivu ariwo Rusizi. Kubera ikirere cyaho n'ubutaka bwaho kubera kwegera hafi ya Nyungwe, haba ubuhinzi bw'icyayi, ikawa, amatunda, inanasi n'uburobyi cyane.

Ibikorwa by'ubukerarugendo nko kujya gusura ku kirwa cyo ku Nkombo, gusura ahantu umwami Musinga yaratuye, gusura imirima y'icyayi, gutembera muri Pariki ya Nyungwe, gutembera mu kiyaga cya Kivu, kujya ku Mashyuza, koga, kugenda mu bwato,..... Ni ahantu haba imbyino n'imivugire zihariye kubera uruhurirane rw'abo bantu bahagenda ndetse n'amafunguro yihariye.

 

 

 

Umujyi wa Rubavu uherereye mu ntara y’uburengerazuba bw’u Rwanda, ni umujyi uri ku nkengero z’ikiyaga cya Kivu, ugahana imbibi n’umujyi wa Goma wo muri Repubulika Iharanira Demokarasi ya Congo.

Ufite umunsi umwe ari muri weekend, konje se, ni byiza gusimbuka ugatembera umujyi wa Rubavu ku buryo amasaha 10 yaba ahangije kwishimira muri ako gace, ukaruhuka.

Ifunguro rya Mugitondo muri Calafia Cafe Shop

Ukigera mu mujyi wa Rubavu, bitewe n'amasaha wakoresheje, wahitamo kuri Calafia ugafata ifunguro rya mugitondo kubera umunaniro w’urugendo waba umaze gukora. Bafite umwihariko wo gukora ikawa za moko menshi. Ni hirya gato ya karere ka Rubavu, utambitse umuhanda ugana ku mupaka munini wa La cronishe, ni iruhande rwo kwa Nyanja!

Ifunguro rya Saa sita ku Inzu Lodge

Wakomeza gutembera usura I Nyamyumba ku Inzu Lodge ukabasha kuhafatira ra ifunguro rya saa sita. Ahantu uba wicaye uruhuka, witegeye amazi ‘ikiyaga cya Kivu. Ni ahantu hagufasha kuruhuka neza.

Umwihariko w’amafunguro yabo harimo; Inzu Lodge fish (7000), Inzu Lodge Chicken (7000). Abatarya inyama(Vegetarian) hari Vegetarian with Toffe (6500). Inzoga za moko atandukanye zo mu Rwanda na mpuzamahanga.

Koga ku mucanga wa One Degree South Bar & Grill

Ni gombwa kujya I Rubavu ukajya no koga, ni byiza kujya kogera ku mucanga wo kuri One Degree South Bar & Grill. Ni ahantu heza cyane hataba akavuyo kandi  n’umutekano ubwa wizewe.

Gufata kamwe muri Discover Rwanda/Rubavu

Kujya kunywera agacupa mui Discover Rwanda , ni byiza, ni hafi ku buryo gutaha bitaza kugorana. Ni ahantu hari ubusitani bwiza burimo ibiti n’indabyo nyinshi na kayaga kava mu Kivu.

Gutaha

Amasaha y’umugoroba aba ageze ugafata urugendo ugataha, wishimye, upanga uko uzagaruka.

 

 

Ni byiza gutembera ahantu ukahasanga bashyigikira ubukerarugendo burambye, kuva ukinjira kugera mu byumba, muri Restaurant, mu busitani ndetse batibagiwe n’abaturage babegereye;  aho ni ku Inzu Lodge

Inzu Lodge hashinzwe mu mwaka 2012, ni ahantu ho gucumbika I Nyamyumba muri Rubavu, ahantu haruguru y’amazi y’ikiyaga cya Kivu, uba wicaye ureba ibirimo kubera mu Kivu, wumva akayaga, inyoni zikuririmbira! Ushobora no gutembera ahandi hantu hatandukanye.

Aho bakirira abantu (Front Desk)

Kwakira neza abantu babagana ni inshingano ya mbere yo mu Inzu Lodge, bazi icyo umushyitsi ari cyo. Ni abantu bafite ubunararibonye mu kwakira abashyitsi batandukanye. Bituma uwahaje abona itandukaniro.

Restaurant & Bar

Ni ahantu hateguye Kinyarwanda/kinyafurika, harimo ibikoresho kuva ku ntebe kugeza ku meza bikoresheje ibikoresho gakondo (ibiti, ibirere, imigano..).Inkuta zaho hatatswe ibitenge byakozwe n’abanyarwanda.

Amafunguro yabo ni aya moko yose, ayo mu Rwanda na mpuzamahanga. Nka bantu bari hafi ya mazi haboneka ifi nziza. Umwihariko w’amafunguro yabo harimo; Inzu Lodge fish (7000), Inzu Lodge Chicken (7000). Abatarya inyama(Vegetarian) hari Vegetarian with Toffe (6500). Inzoga za moko atandukanye zo mu Rwanda na mpuzamahanga, nazo ibiciro ntabwo bikanganye cyane ni ibisanzwe.

Ntawa kwibagirwa ko badacuruza amazi yo mu macupa (Plastic Free) niho hantu ha mbere mu Rwanda baciye ubu buryo bwo kureka gukomeza kwangiza ibidukikije bakoresha amacupa ya palasitike. Batanga amazi y’ubuntu ku bakiriya bayashaka.

Amacumbi

Uburyo bwa mbere bwo gucumbika bukoresheje amahema(Tente) harimo igitanda n’ibindi byibanze byose. Kuva ku  mafaranga ibihumbi 25 000 -45 000 by’amanyarwanda, bitewe nuko mungana mubona aho mucumbika bababereye kandi hari umutekano wuzuye.

Mu rwego rwo gusigasira ibidukikije ubwiherero tuwalete (toilet) n’urwogero (douche)  biri hanze bitari kure cyane, bigafasha mu kubyaza umusaruro iyo myanda.

Ifunguro rya mu gitondo utanga komande, bakarigutegurira, kuva ku mafaranga 3500-5500 rigizwe n’ikawa/icyayi, imbuto, umutobe w’umwimerere n’ umugati cyangwa Capati.

Gift Shop

 

Ahantu bateguriye ababagana ho kugurira impano, urwibutso rwo ku Inzu Lodge! uhasanga ibintu bitandukanye bikorwa n’abaturage bo muri Koperative zituriye aho hafi harimo imyenda, ingofero, ibikapu, inkweto, ibihangano by’ubugeni bitandukanye,..ibyo byose bikabafasha kwiteza imbere. Mu ntego za mbere ni ugufasha abana kubona ibikoresho byo kujyana ku ishuri. Dumbo back to School, iyo uguze ikintu bifasha abana benshi kubona ibikoresho by’ishuri.

Abakunda ibitabo (Book Lovers) mushobora gutira igitabo ukagenda ukagisoma. Haboneka n’iby’ubuntu ku baharaye.

Ubusitani

Ubusitani burimo indabyo zitandukanye, kubera ikirere cyaho, ubutaka bwaho haba indabyo nziza cyane ndetse n’ibiti ku buryo uba ubona ari muri Paradizo!

Ubasha no gukina imikino itandukanye y’abana ndetse n’abakuru harimo; volleyball, football, ikibuguzo na Dame. Haboneka na eterinete nziza(WIFI).

Gucumbika ku Inzu Lodge wababwira mbere/koresha reservation kuri Booking.com na  Airbnb cyangwa ukohereza email kuri This email address is being protected from spambots. You need JavaScript enabled to view it. cyangwa ugahamagara kuri 0784179203.

Kugera ku Inzu Lodge uvuye mu mujyi wa Rubavu Taxi voiture ni amafaranga 5000-7000, moto (1000-1500), uturutse kuri Bralirwa ni 300 cyangwa ukagenda n’amaguru ni hafi. Ushobora no gutega twegerane (Taxi) kuva mu mujyi kugera kuri Bralirwa ni amafaranga 300.

Ntuzibagirwe kugaragaza aho waturutse!Agakino

 

Ibihugu bigize umuryango w’Ibiyaga bigari (Règion Grand Lacs) uhuza u Rwanda, Burundi na RDC. Ni akarere karimo ibiyaga binini bifite amateka kandi bikize ku bikomoka muri ibyo biyaga. Umujyi wa Rubavu na Goma izwi nk’imijyi y’impanga mu Karere k’Ibiyaga Bigari (Vlles jumelles dans la Règion des Grand Lacs/Twin Cities in Great Lake Region). Ni imijyi iri ku nkengero z’ikiyaga cya Kivu.

  <On dit localement: Goma nourrit Gisenyi, Gisenyi loge Goma, bishatse gusobantura ko, Goma igaburira abanyagisenyi. Gisenyi icumbikira abanyegoma>

Ni imijyi ifite amateka hagati yayo kuva mu gihe cy’ubukoroni ubwo Ngoma bivuga Tam Tam (hari ikigo cy’ababiligi mu gihe I Gisenyi (Rubavu) hari ikigo cy’abadage. Ni imijyi yabayemo intambara hagati y’abakoroni mu ntambara ya kabiri y’isi.

Rubavu

Umujyi wa Rubavu uherereye mu burengerazuba bw’u Rwanda, Umujyi ukurura abantu benshi cyane kubera uherereye ku nkengero zikiyaga cya Kivu. Ni umujyi ufite umupaka wa mbere unyurwaho n’abantu benshi mu Rwanda ari abakora ubucuruzi, abatemberera muri ibi bihugu byombi no mu karere. Umujyi ufite umusozi wa Rubavu, ufite ikibuga cy’indege cya Rubavu (Gisenyi), niho hari urwirohero rw’umugezi wa Sebeya mu Kiyaga cya Kivu. Urugo rwa musenyeri wa mbere mu Rwanda (Mgr Bigirumwami Aloys)  ruri I Kifufi rwubatswe mu….., uruganda rwenga inzoga rwa Bralirwa ndetse n’amashyuza biri I Nyamyumba, utibagiwe uturwa turi mu kiyaga cya Kivu ndetse n’isambaza.

Ni umujyi ufasha gukora urugendo rwa Crete Congo Nile, urugendo ushobora gutangirira muri uyu mujyi ugenda n’amaguru, ukagendera mu bwato, igare ndetse n’imodoka.Uturutse muri uyu mujyi wabasha gusura Pariki ya Gishwati n’imisozi, ukagera no mu mujyi wa Karongi na Rusizi ukoresheje umuhanda Kivu Belt.

Goma

Umujyi wa Goma uherereye ku birenge by’ibirunga bya Nyiragongo na Nyamuragira, ukaba ku nkombe z’ikiyaga cya Kivu no hafi ya Pariki ya Virunga. Umujyi ufite agace kazwi cyane kazwi nka quartier Birere! Ni umujyi uri mu burasirazuba bwa Repuburika iharanira Demokarasi ya Congo mu ntara ya NORD KIVU. Ni umujyi utuwe n’abantu benshi kandi uberamo ibikorwa by’ubucuruzi byinshi mu gihugu cya Congo.Ukaba ufite ikibuga cy’indege cya Goma (Byahi) hari n’Umuhanda Goma-Sake wubatswe n’ababiligi mu 1954.

Ni umujyi urimo inzira zigana mu mujyi wa Bukavu unyuze mu bwato (ferries) ukagera mu mijyi y’indi nka Beni, Kisangani, Butembo, Bunia ushobora gukoresha indege cyangwa imodoka.

Hari imipaka ibiri ihuza iyi mijyi; Grande Barière na Petite barière ifunga 18h na 20h.

Page 9 of 35

Igiseke

culture-in-rwanda

Kwamamaza

Umurage Wacu 3lOGO UMURAGECqAJqoFW8AAF6RY.jpg large

Facebook

Inkuru zose

© 2016  Umurage Wacu  Group 

Tel:+250 783541018 /728541018

Email:umuragewacugroup@gmail.com

Address:Kigali-Rwanda

Design by FRI SOFT Ltd